D’Stad a Lampertsbierger Musek huet den 28. Februar 2025 op hir ausseruerdentlech an uerdentlech Generalversammlung invitéiert.
De President André Hever huet no senger Begréissung der Stad Lëtzebuerg, de Sponsoren a Sympathisante Merci gesot fir hir Ënnerstëtzung an Hëllef. E grousse Merci goung och un d‘Membere vum Kommitee an un d‘Museker a Musekerinnen. De verstuerwene Membere goufen an enger Gedenkminutt erënnert. Hei ass besonnesch un de fréiere Kommiteesmember a Museker Keith Platt geduecht ginn.
Fir d’Ufuerderunge vun der neier Gesetzgebung ze respektéieren, goufen déi iwwerschafft Statuten eestëmmeg ugeholl. De Sekretär Christian Block huet dunn den Aktivitéitsbericht vum Joer 2024 virgestallt, den Tresorier Joachim Block huet e positive Bilan vun der finanzieller Situatioun vum Veräin gemaach. D’Revisoren Norbert Brausch an Armand Engling hunn dem Tresorier Entlaaschtung ginn.
De Kommitee setzt sech follgendermoossen zesummen: Christian Block, Joachim Block, Carine Hauswirth, André Hever, Pierre Langehegermann, Sam Martins, Anne Muller a Laurent Schmit.
No der Presentatioun vun de geplangten Aktivitéite fir 2025 an dem Budget sinn eng Rei Museker fir hire laangjäregen Asaz geéiert ginn. Am Numm vun der UGDA huet d’Madamm Manuela Wiseler no enger klenger Usprooch follgend Medailen iwwerreecht:
- 5 Joer: Insigne fir d’Hannah Block, den Alex Engling an d’Amalia King
- 30 Joer: distinction d’honneur en vermeil fir d’Carine Hauswirth, de André Hever an de Urbain Hever
- 40 Joer: distinction d’honneur en vermeil avec couronne de laurier fir de Christian Block
- 50 Joer: médaille de mérite en argent „Grand-Duc Adolphe“ fir d’Solange Redondo
- 60 Joer: médaille de mérite en vermeil „Grand-Duc Adolphe“ fir de Jeannot Wolff
De Sekretär vun der USMVL, den Här Emile Hermes, krut uschléissend d’Wuert an huet follgend Museker a Musekerinne fir hiren Asaz geéiert:
- D’Anne Muller an de Felix Pauly si fir 10 Joer Asaz an enger Stater Musek ausgezeechent ginn,
- fir 15 Joer kruten de Philippe Brausch, d‘Emma Lily Karier an de Lucien Pauly eng Medail iwwerreecht,
- den Alban Birch fir 25 Joer a
- de Joachim Block an de Roger Braun fir 55 Joer
No enger fräier Diskussioun ass den Owend bei engem gemittleche Patt a Maufel ausklénge gelooss ginn.